افغانستان کریکټولایتي سیالۍ

مس عینک د دوهمې لوبډلې په توګه پایلوبي ته لاره پېداکړه

د زونونو په کچه د غازي امان الله خان جام لېسټ اې سیالیو په ایلیمینېټر لوبه کې نن مس عینک لوبډلې د بندامیر لوبډلې ته د ۷ ویکټو په توپیر ماتې ورکړه او د یادو سیالیو پایلوبې ته یې لاره وموندله.

 د ننۍ لوبې پچه مس عینک لوبډلې وګټله او بندامیر لوبډلې ته یې لومړی د توپوهنې بلنه ورکړه.

 بند امیر لوبډلې د لوبې په ۳۳،۱ اور کې د ټولو لوبغاړو په سوځېدو سره ۱۲۹ منډې جوړې کړې او مس عینک لوبډلې ته یې د ۱۳۰ منډو هدف وټاکه.

بندامیر ته په توپوهنه کې دروېش رسولي ۵۲، حشمت الله شهیدي ۲۶ او عمران جنت ۱۷ منډې ترسره کړې.

بل لور مس عینک ته په توپ اچونه کې ضیاء اکبر ۵، حسیب الله ۳، ضیاء شریفي او شاهدالله یوه-یوه ویکټ ترلاسه کړه.

ورپسې مس عینک لوبډلې د ټاکلي هدف د پوره کولو په موخه توپوهنه پیل کړه.

 مس عینک لوبډلې ټاکلی هدف د لوبې په ۳۷،۳ اور کې د ۳ لوبغاړو په سوځېدو سره پوره کړ او بندامیر ته یې د ۷ ویکټو په توپیر ماتې ورکولو سره د روانو سیالیو پایلوبې ته لار ومونده.

 مس عینک ته په توپوهنه کې رحمت شاه ۶۸ ناسوځېدلي، عمران میر ۳۶ او غمي ځدراڼ ۱۷ ناسوځېدلي منډې جوړې کړې.

 بند امیر ته په توپ اچونه کې حمزه هوتک ۳ لوبغاړي وسوځول.

د مس عینک لوبډلې توپ اچونکی ضیا اکبر چې د بندامیر لوبډلې ۵ ویکټې یې ا خیستې وې، د لوبې غوره لوبغاړی وټاکل شو.

د یادولو وړ ده چې د غازي امان الله خان یو ورځنیو سیالیو پایلوبه راتلونکې پنجشنبه په کندهار کرکټ لوبغالي کې د مس عینک او امو لوبډلو ترمنځ تر سره کیږي.

نسیم حمیدي

نسیم حمیدي په کندهار کې د افغان کریک اینفو خبریال

ورته خبرونه

Back to top button
error: وبښه دغه نه کاپي کیږې